دووەمین فیستیڤاڵی كەلتورە جیاوازەكان لە شاری رانیە ئەنجام دەدرێت

بەروار: 7 ساڵ لەمەو پێش

لەژێر دروشمی (بەرەو پتەوكردنی پردەكانی پەیوەندی كەلتووری ناوچەو جێگا جیاوازەكانی كوردستان) سەنتەری رایەڵ بۆ ئاڵوگۆری كەلتوری‌و چالاكی رۆشنبیری كە ناسراوە بە R.C.E, دووەمین فیستیڤاڵی كەلتورە جۆراو جۆرەكانی كوردستان بۆ 11 تیپ و گروپی جیاواز لە ناوەوەو دەرەوەی وڵات, لە شاری رانیە ئەنجام دەدات. بۆ ئەو مەبەستە (خالید قادر محمد) لێپرسراوی سەنتەری رایەڵ لە لێدوانێكدا رایگەیاند:  لە رۆژی 30 و 31/10/2012 لە شاری رانیە دووەمین فیستیڤاڵی كەلتورە جۆراو جۆرەكانی كوردستان, ئەنجام دەدەن كە هەر یەك لە تیپەكانی (گروپی كیژانی رانیە, تیپی هونەری میللی سریان, تیپی شاریای ئێزیدی, تیپی شونوار لە خوراسان, تیپی روبادی هونەری لە دهۆك, تیپی شەدە وەردی كەركوك,- توركمان,  تیپی هونەری میللی برایەتی كەركوك, تیپی روناك لە كوردستانی رۆژهەڵات, تیپی سۆزی گەرمیان, تیپی میوزیكی لاوەند لە بەغدا- برایانی فەیلی) بەشداری تێدا دەكەن, ئەم فیستیڤاڵە بۆ ماوەی دوو رۆژ بەردەوام دەبێت, چالاكیەكەش لە رێكەوتی 30-10-2012 لە كاتژمێر 6:30 ئێوارە, لە پاركی دەروازەی شاری رانیە دەستپێدەكات و لە رێگای كۆمپانیای بابیلۆن كاری تۆماركردنی بۆ دەكرێت و راستەوخۆش لە چەند كەناڵێكی ئاسمانی دەگوازرێتەوە,  ئەم فیستیڤاڵە بە هاوكاری بەرێوبەرایەتی رۆشنبیری‌و هونەری رانیە كە سەر بە بەرێوبەرایەتی گشتی رۆشنبیری و هونەر و وەرزش و لاوانی سلێمانیە, لە وەزارەتی رۆشنبیری, بودجەی بۆ تەرخانكراوەو لە رێگای سەنتەرەكەمانەوە جێ‌ بەجێ‌ دەكرێت.  ئامانجی سەرەكی چالاكیەكەش كۆكردنەوەی جیاوازییەكان‌و  گرنگی دانە بە پەیامی ئاشتی‌و بەهێزكردنی رایەڵی نێوان كەلتورە جۆراو جۆرەكانە بە ئاراستەی خزمەتكردنی نیشتیمان. جێگای ئاماژەیە سەنتەری رایەڵ بۆ ئاڵوگۆری كەلتوری لە مانگی 12 ساڵی 2010 مۆڵەتی یاسایی لەوەزارەتی ناوخۆی حكومەتی هەرێمی كوردستان وەرگرتوە,  ئەم سەنتەرە كار لە بواری ئاڵوگۆری كەلتوری لە ناوەوەو دەرەوەی وڵاتدا دەكات. تا ئێستا چەندین كارو چالاكی سەركەوتووی لەو بوارەدا ئەنجامداوە, بەتایبەت بۆ دروستكردنی پەیوەندی ئاڵوگۆری كەلتوری لەگەڵ وڵاتە یەكگرتوەكانی ئەمریكا, دروستكردنی پەیوەندی كەلتوری لەگەڵ (لاز) و (چەركەس)ەكان‌و گۆرینەوەی چالاكی  لەگەڵ شاری (ئاماد)ی كوردستانی باكوور. هەروەها لە بواری ناوخۆدا توانیوانە لەگەڵ برایانی ئێزیدی‌و سریانی و توركمان پەیوەندییەكی بەهێز دروستبكەن‌و ئەم چالاكیەش دووەمین فیستڤاڵی ئاڵوگۆری كەلتورییە كە لە ناوخۆی هەرێمی كوردستان و بۆ چەندین تیپ و كەلتوری جۆراو جۆر, لە شاری رانیە ئەنجامی دەدات.

تاگەکان: