چوارەمین فێستیڤاڵی كەلتورە جیاوازەكان لە رانیە بەرێوەچوو

بەروار: 6 ساڵ لەمەو پێش

بەمەبەستی رێزگرن لە پێشمەرگە و لە ژێر دروشمی (ئاشتی و پێكەوە ژیانی كلتورە جیاوازەكان) سەنتەری رایەڵ بۆ ئالوگۆری كەلتوری چوارەمین فێستیڤاڵی كەلتورە جیاوازەكانی ئەنجامدا.

بە ئامادەبوونی جێگری سەرۆكی حكومەت و، نوێنەری هاوپەیمانی نێودەوڵەتی و، نوێنەری چەند قونسڵخانەیەك و، چەندین رۆژنامەنوس و میوانی بیانی و بە ئامادەبوونی هەزاران بینەر، رۆژی پێنج شەممە رێكەوتی 22-9-2016 لە پاركی دەروازەی شاری رانیە، بە بەشداری 12 تیپ و گروپ و كەلتوری جیاوازو، چوارەمین فێستیڤاڵی كلتورە جیاوازەكان لە شاری رانیە بەرێوەچوو.

ئەم فێستیڤالە كە دوو رۆژی خایاند، لە رۆژی یەكەمدا كاتژمێر 8:15 خولەكی شەو، بە یاری ئاگرین و دەقەیەك وەستان بۆ گیانی شەهیدان، فێستیڤاڵ دەستی پێكرد، پاشان وتاری هەریەك لە (خالید قادر) سەرپەرشتیاری فێستیڤاڵ و( هیوا قەرەنی) قائیمقامی قەزای رانیە خوێندرانەوە، تێیدا ئاماژەیان بە گرنگی ئاڵوگۆری كەلتوری و ئاشتی و پێكەوە ژیانی كەلتورە جیاوازەكان كرد و لەسەر رەوشی ئێستاشی هەرێمی كوردستان و ناوچەكەش بە گشتی، هیوایان خواست هەموان بە ئاشتی و پێكەوەییەوە كار بۆ چارەسەری كێشەكان بكەن و گرنگی زیاتر بە هونەر و توانای گەنجان بدرێت و ئەم فێستیڤاڵە ببێتە هۆی زیاتر قوڵبوونەوەی گیانی تەبایی و یەكتر ناسینی كەلتورە جیاوازەكان و ئاشتی و ئاوەدانی بۆ هەرێمی كوردستان.
پاشان نمایشی گروپەكان دەستی پێكرد و وەك رێزگرتنیش لە قوربانیانی شنگال، تیپی هونەری شاریای یەزیدی یەكەم تیپی سەر شانۆ بو كە بە نمایشی پێشمەرگە چالاكییە هونەرییەكانی ڤیستیڤالی دەست پێكرد.
پاشان هەریەك لە تیپەكانی ( هونەری میللی بەغداد، تیپی هونەری میللی هەولێر، تیپی روناك (كلتورە جیاوازەكانی ئێران)، تیپی هونەری دهۆك، گروپی هەرای قوچانی لە خوراسان ، تیپی برایەتی كەركوك (عەرەب – كورد – توركمان – سریانی) بە چەندین تابلۆی هونەری و میوزیك و گۆرانی رەسەنی ناوچەكانیان درێژەیان بە چالاكیەكانی شەوی یەكەمی فێستیڤاڵدا.

لە رۆژی دووەمی فێستیڤاڵی كلتورە جیاوازەكانی رانیە، لە هۆلی كۆلێژی پەروەردەی بنەرت لە زانكۆی راپەرین، دوای كردنەوەی پێشانگایەكی فۆتۆگرافی لەسەر ناوچەكە، سمبزیۆمێكی هونەری بۆ تابلۆ هونەرییەكانی 7 وڵات كرایەوە، پاشان دیالۆگێكی كلتوری نەتەوە جیاوازەكان بۆ بەشداربوی فێستیڤال بەرێوەچوو، تێیدا وێرای باس كردن و ناساندنی كلتورەكانی بەشدار بوی فێستیڤال، راسپارادەیەكی كلتوری لە كۆتایی دیالۆگەكەدا بڵاو كرایەوە كە پەیامی ئاشتی و پێكەوە ژیانی كلتورەكانی لە خۆ گرتبوو.

لە شەوی دووەمی فێستیڤالدا، بە چالاكی هونەری و بە ئامادەبونی زیاتر لە 10 هەزار كەس، چالاكیە هونەرییەكانی چوارەمین فێستیڤالی كلتورە جیاوازەكان درێژەی پێ‌ درا.
لە شەوی دووەمی چالاكییەكانی فێستیڤالدا هەریەك لە تیپەكانی ( تیپی مۆزیكی رانیە و تیپی هونەری میللی هەولێر،، تیپی نەتەوەیی هونەرە میللیەكانی بەغداد، گروپی یارسان (شاخوشین و دایرەك خاتون)، گروپی باران لە بوشەهرـ تیپی هونەری میللی دهۆك، یانەو سیاوچەمانەی هەورامان، تیپی برایەتی كەركوك، تیپی شاریای یەزیدی، بە نمایشی تابلۆ هونەریەكانیان و میوزیك و گۆرانی رەسەن و كلتوری ناوچەكانیان بەشداریان تێدا كرد.
لە كۆتایی چالاكییەكانی فێستیڤاڵیشدا لە لایەن هەر یەك لە سەنتەری رایەڵ، ئیدارەی راپەرین، قائمقامی قەزای رانیە، سەرۆكایەتی شارەوانی رانیە، و چەند كەسایەتیەك دیاری و خەلاتی رێزلێنان بەخشرایە، تیپە بەشداربوەكان و ستافی سەنتەری رایەڵ كە خۆبەخشانە بۆ سەركەوتنی چوارەمین فێستیڤاڵی كلتورە جیاوازەكان كاریان كرد.

سەنتەری رایەل بۆ ئالوگۆری كلتوری ساڵی 2010 دامەزراوە و كار لە بواری ئاڵوگۆری كەلتوری لە ناوەوەو دەرەوەی وڵات دەكات و تا ئێستا چەندین چالاكی گرنگی لەو بوارەدا ئەنجامداوە و كە تێیدا فێستیڤالی كلتورە جیاوازەكان بەشێكە لە ئەجێندای كارەكانی و ساڵانە لە شاری رانیە ئەنجام دات.

تاگەکان: