سەنتەری رایەڵ ئەمریكییەكان سەرسام دەكات

بەروار: 10 ساڵ لەمەو پێش

سەنتەری رایەڵ ئەمریكییەكان سەرسام دەكات

راپۆرتی گشتی كارو چالاكییەكانی تیمی ئاڵوگۆری كەلتوری ئەمریكا لە كوردستان
ئا: راگەیاندنی سەنتەری رایەڵ
لە چوارچێوەی پرۆگرامی ئاڵوگۆری كەلتوری (سەنتەری رایەڵ بۆ ئاڵوگۆری كەلتوری R.C.E ) لە هەرێمی كوردستان و تیمی ئاڵوگۆری كەلتوری وڵاتە یەكگرتوەكانی ئەمریكا لە شاری (Duluth)ی ولایەتی میناسوتا, سەر لە بەیانی رۆژی 17-3-2013 كاتژمێر چواری سەر لە بەیانی تیپی كۆراڵی (سەدای ئاشتی ئەمریكا) كە بریتی بوون لە 22 كەس گەیشتنە فرۆكەخانەی نێودەوڵەتی هەولێر‌و لەگەڵ گەیشتنیان لە لایەن تیمێكی باڵای سەنتەری رایەڵەوە پێشوازی كران, دواتر و لە دەستپێكی پرۆگرامی كارەكانیان
لە كاتژمێر 11 پێش نیوەرۆی هەمان رۆژ سەردانی ئۆفیسی سەرەكی ئەنجومەنی باڵای خانمانی كوردستانیان لە شاری هەولێر كرد و لە لایەن خاتوو (ئەمەل جەلال)‌و (دڵخواز عبدالله) ئەندامانی ئەنجومەنی باڵا پێشوازییەكی گەرم كران, دواتر لە كۆبونەوەیەكی هاوبەشدا باس لە كارەكانی ئەنجومەنی باڵای خانمان كرا‌و چەند زانیارییەك لەسەر پرسی ژنان لە هەرێمی كوردستان خرانە روو, هەروەها داواش كرا ئاستی ئەو پەیوەندییە فراوانبكرێت, بە تایبەت بۆ بواری كەمكردنەوەی توندوتیژی خێزان.
پاشان لە نیوەرۆ خوانێكدا كە لە لایەن ئەنجومەنی باڵای خانمانەوە بۆ شاندەكە رێكخرابوو, ( د.كاوە محمود) وەزیری رۆشنبیری و (عەلی حمەد بەگ) جێگری سەرۆكی دەزگای كاروباری مین لە هەرێمی كوردستان, سەردانی شاندەكەیان لە ئوتیل چوار چرا كرد, تێیدا خۆشحاڵی خۆیان بۆ هاتنی ئەم شاندەی ئەمریكا دەربڕی و هیوایان خواست لە ماوەی مانەوەیاندا ئاستی پەیوەندییە كەلتورییەكانی هەرێمی كوردستان و ئەمریكا فراوانبكەن.
دواتر لە كاتژمێر (5)ی ئێوارەی رۆژی 17-3-2013 لە بەردەم ئوتیڵی بیتوێنی خێزانی لە شاری رانیە, بە ئامادەبوونی قائیمقامی قەزای رانیەو سەرۆكی شارەوانی رانیە و رێژەیەكی زۆر لە رێكخراوەكان و رۆشنبیران و جەماوەری ناوچەكە پێشوازییەكی فراوان لە گەیشتنی سێەمین شاندی شاری Duluth بۆ شاری رانیە كرا كە ماوەی 3 ساڵە پرۆگرامی ئاڵوگۆری كەلتورییان لە نێواندا هەیە.
لە دەستپێكی گەیشتنیان پێشانگایەكی فۆتۆگرافی هاوبەش بۆ 10 فۆتۆگرافەری ناوچەكە لە هۆڵی بیتوێنی خێزانی كرایەوە, كە چەندین دیمەنی جوانی كەلتور و سروشتی ناوچەكەی لەخۆگرتبوو. دواتر لە كاتژمێر (8:30) شەو لە هۆڵی پێنجی ئازار, بە ئامادەبوونی رێژەیەكی زۆری جەماوەری دەڤەرەكە, تیپی كۆراڵی ئاشتی ئەمریكا كۆنسێرتێكی كۆراڵیان پێشكەش كرد, لەو كۆنسێرتەدا سەرەتا (خالید قادر) لێپرسراوی سەنتەری رایەڵ وتەیەكی خوێندەوە تێیدا باسی لە گرنگی پرۆگرامی ئاڵوگۆری كەلتوری سەنتەرەكەیان لەگەڵ تیمی ئاڵوگۆری كەلتوری ئەمریكا لە شاری Duluth كرد و مێژووی پەیوەندییەكە‌و ئامانجی سەردانەكەیانی بۆ ئامادەبووان رونكردەوە, دواتر هەشت بەرهەمی هونەری, كە گوزارشتیان لە پەیامی ئاشتی و برایەتی و دۆستایەتی دەكرد لە لایەن تیپەكەوە پێشكەش كران, هەروەها بەرهەمێكی كوردییان بە ناوی (خۆشم دەویی وڵاتەكەم) پێشكەشی ئامادەبوان كرد, هاوكات لەگەڵ ئەوە چنراوێكی تایبەت كە بەرهەمی سەرجەم كیشوەری جیهانی لە خۆ گرتبوو, لە لایەن ئەم تیمەی ئەمریكاوە پێشكەشی سەنتەری رایەڵ كرا, وەك گوزارشتێك بۆ پتەوكردنی دۆستایەتی و پرۆگرامی دەستەخوشكی هەردوو شاری رانیەو شاری Duluth كە لە لایەن سەنتەری ناوبراوەوە سەرپەرشتی دەكرێت.
بۆ رۆژی دواتر واتە رۆژی 18-3-2013 شاندەكە سەردانی شاری هەڵەبجەی كرد و لە لایەن گروپێك لە چالاككوانانی ئەو شارەوە پێشوازی كران, پاشان مۆنۆمێنتی شەهیدانی هەڵەبجەیان بەسەر كردەوەو لە دەفتەری یادەشتەكانی ئەو مۆنۆمێنتەدا, هاوخەمی و پەرۆشی خۆیان بۆ بنەماڵەی شەهیدان تۆمار كرد و پشتیوانی خۆیان بۆ بە جینۆساید ناساندنی ئەم كارەساتە دەربڕی.
– لە كاتژمێر (3)ی دوای نیوەرۆ لە هۆڵی مۆنۆمێنتی هەڵەبجە بە ئامادەبوونی رێژەیەكی زۆر لە دانیشتیوانی هەڵەبجەی شەهید, كۆنسێرتێكی كۆراڵیان كە (7) بەرهەمی لە خۆ گرتبوو پێشكەش كرد, كە گوزارشت بوو لەدەڕبڕبنی خۆشەویستی و پشتیوانیان بۆ خەڵكی هەڵەبجە, پاشان سەردانی گۆرستانی شەهیدانی هەڵەبجەیان كرد‌و, مەراسیمی نزاو پارانەوەیان بۆ شەهیدانی ئەم كارەساتە ئەنجامدا.
– سەر لە بەیانی رۆژی 19-3-2013 لە شاری سلێمانی شاندە كەلتورییەكەی ئەمریكا سەردانی مۆزەخانەی نیشتیمانی (ئەمنە سورەكە)یان كرد‌و بەشەكانی مۆزەخانەكەیان بەسەر كردوە. دواتر لە كاتژمێر (3:30) لە تەلاری هونەر كۆنسێرتێكی كۆراڵیان پێشكەش كرد, لەو كۆنسێرتەدا كە رێژەیەكی زۆر لە چالاككوانان و خەڵكی شاری سلێمانی تێیدا ئامادەبوون, چەند بەرهەمێك كۆراڵ پێشكەش كرا, هەروەها لە لایەن (خاتوو سارا) بەرپەرسی تیپەكەوە, پەیامی هاورێیەتی و دۆستایەتی خۆیان بۆ گەلی كورد دوپاتكردەوە.
– لە كاتژمێر 8 شەو شاندەكە سەردانی قاوەخانەی كەلتوری لە شاری سلێمانی كرد و تێیدا لەگەڵ بەشێك لە چالاككوانانی مەدەنی بیرورایان گۆرییەوە هەروەها چەند بەهەمێكی هونەرییان لە قاوەخانەكەدا پێشكەش كرد و گوێبیستی چەندین مۆزیك و گۆرانی كوردیش بوون كە لە لایەن كۆمەلێك گەنجی كور و كچی ناو قاوەخانەكەوە دەوترانەوە.
– بۆ رۆژی دواتر واتە (20-3-2013) شاندەكە بەشدارییان لە ئاهەنگەكانی نەورۆز لە شاری سلێمانی لە (گۆیژە)و (سەهۆڵەكە)ی سلێمانیدا كرد و لەگەڵ هاوڵاتیانی ئەو شارەدا بە شایی و گۆرانی جەژنی نەورۆزیان پیرۆز كرد,
– پاشان لە رۆژی 21-3-2013 لە غاباتی شاری رانیە بەشداری سەیران و ئاهەنگەكانی نەرۆزیان لە شاری رانیەدا كرد, هاوكات لەگەڵ ئەوەش لە نیوەرۆی ئەو رۆژەدا لە لایەن ستافی رایەڵەوە خوانێكی تایبەت بۆ خواردنە كوردییەكان بە میوانەكانی ئەمریكا رێكخرا, دواتر بە بەشداری كردن لە شایی كوردی و وتنەوەی سروودی خۆشم دەوێی وڵاتەكەم پەیامی دۆستایەتی و هاورێیەتی خۆیان بۆ خەڵكی شاری رانیە دووپاتكردوە كە بۆ ماوەی 3 ساڵە بۆتە دەستەخوشكی شارەكەیان.
– – رۆژی 22-3-2013 شاندەكە سەردانی پاركی دەروازە و یادگاری (رانیە و دولوس) و مۆنۆمێنتی راپەرین و ناوبازاری شاری رانیەیان كرد, پاشان سەردانی ئۆفیسی سەرەكی (سەنتەری رایەڵ بۆ ئاڵوگۆری كەلتوریR.C.E ) یان كرد و لەگەڵ بەشێك لە ستافی ئەو سەنتەرە, لەسەر فراوانكردنی پەیوەندییەكانیان گفتگۆیان ئەنجامدا, هەروەها تەئكیدیان لە گەشەپێدانی پەیوندییەكانیان لەگەڵ ئەو سەنتەرەدا كردوە كە بڕیارە لە ئەمساڵدا ئاستی پەیوەندییە ئاڵگۆرە كەلتورییەكانیان چەندین وڵاتی تر بگرێـتەوە.
– لە كاتژمێر 8 شەو لە هۆڵی رانیە مۆڵ بە ئامادەبوونی بەرپرسانی حكومی و حزبی و نوێنەری بەشێك لە رێكخراوەكان و مامۆستایانی ئاینی و رێژەیەكی زۆر لە هونەرمەندان و نوسەرانی ناوچەكە مەراسێمێكی ماڵئاوایی بۆ شاندەكە رێكخرا, كە تێیدا سەرەتا لەلایەن (عبدالحمید عبدالله) سەرپەرشتیاری ئیدارەی راپەرین و( هیوا قەرەنی) قائیمقامی قەزای رانیەو ( عەلی حمد بەگ) جێگری لیپرسراوی دەزگای مین‌و ( بەختیار ئەحمەد) سەرۆكی شارەوانی رانیە و (خالید قادر) لیپرسراوی سەنتەری رایەڵ چەند وتەیەك خوێندرانەوە, پاشان پەیامی فەرمی حاكمی شاری Duluth و پەیامی فەرمی شاری رانیە لە لایەن ( برۆكس ئەندرسن) سەرۆكی تیمەكەو قائیمقامی قەزای رانیە ئاڵوگۆر كرا, دواتر چەندین سرود و گۆرانی و لە لایەن تیپی سەدای ئاشتی ئەمریكا و بەشداربوانی مەراسیمەكە پێشكەش كران, هەروەها چەندین خەڵات و دیاری لە نێوان هەردوو لا گۆردرایەوە.
– دوا بە دوای ئەوەو لە كاتژمێر 4 بەیانی رۆژی 23-3-2013 شاندەكە گەیەنرایە لە فرۆكەخانەی سلێمانی بە باوەشی پر لە خۆشەویستی ماڵئاواییان لە تیمە یاوەرەكەیان لە سەنتەری رایەڵ كرد و بەرەو وڵاتەكەی خۆیان گەرانەوە.
جێگای ئاماژەیە ئەو پەیوەندییە كەلتورییە سەنتەری رایەڵ و تیمی ئاڵوگۆری كەلتوری شاری Duluth بۆ ماوەی 3 ساڵە بەردەوامە تا ئێستا 3 شاندی ئەمریكا سەردانی كوردستانیان كردەوەو دوو شاندی (سەنتەری رایەڵ)یش بۆ هەمان مەبەست سەردانی ئەو وڵاتەی كردۆتەوە.

تاگەکان: