روماڵی یەكەمین شاندی كەلتوری شاری Duluth ی ئەمریكا بۆ شاری رانیە ٢٠٠٩

بەروار: 12 ساڵ لەمەو پێش

روماڵی یەكەمین شاندی كەلتوری شاری Duluth ی ئەمریكا بۆ شاری رانیە ٢٠٠٩

بەمەبەستی دروستكردنی پەیوەندییەكی ئاڵوگۆری كەلتوری لە نێوان شاری رانیەو شاری Duluthی ئەمریكا, دوای نیوەرۆی رۆژی 19-5-2009 كاتژمێر(3)ی دوای نیوەرۆ وەفدێكی باڵای ئەو شارەی ئەمریكا گەیشتنە فرۆكەخانەی سلێمانی‌و لەوێش لە لایەن قائمقامی قەزای رانیەو منداڵپارێزی كوردستان‌و بەرێوبەری سەنتەری چالاكی گەنجانی رانیە پێشوازی كران. لەگەڵ گەیشتنیان بە شوێنی حەوانەوە لە شاری رانیە لە لایەن نوسەر‌و رۆژنامەنوس‌و بەرپرسە ئیداریەكانی ناوچەكەو بەشێك لە رێكخراوەكانی كۆمەڵگای مەدەنی پێشوازییان گەرمییان لێكرا. دواتر لە رۆژی 20/5/2009 كاتژمێر 9ی سەر لە بەیانی لە هۆڵی سەنتەری چالاكی گەنجانی رانیە، نوێنەرانی هەردوو شاری رانیەو Duluth ی ئەمریكا لە دانیشتنێكدا بیرورایان گۆریەوەو كە تێیدا تەكید لە فراوانكردنی ئەو پەیوەندییە بە ئاراستەی پرۆگرامی و ئاڵوگۆری كەلتوری‌و دەستە خوشكی هەردوو شار كرایەوە, لە ئەجێندای ئەم كۆبونەوەیەدا سەرەتا بەڕێوەبەری سەنتەری گەنجان, بەخێرهاتنی میوانەكان كردو خۆشحاڵی خۆی بەو پەیوەندیە دەربڕی كە لە رێگای پەیوەندیەكانی خۆیانەوە توانیویانە بگەنە ئەنجامی ئەو دۆستایەتیە، دواتر لەلایەن مامۆستا (عەلی حەمەد بەگ) قائیمقامی ئەو كاتەی قەزای رانیەوە, وتەیەكە پێشكەش كرا كە تێیدا وێرای بەرز هەڵسەنگاندنی ئەو جۆرە پەیوەندییانە, چەند زانیاریەكیشی لەسەر مێژووی شاری رانیەو كار‌و پرۆِژەی فەرمانگەو دامەزراوەكانی بۆیان رونكردەوە، پاشان هەردوو لا لەسەر پرۆگرامی ئاڵوگۆری كەلتوری و دەستەخوشكی هەردوو شار رێككەوتن بۆ ئەمەش وەفدی میوان نامەی ( دۆن نیس) حاكمی شاری دولوزیان پێشكەش بە قائیمقامی قەزای رانیە كرد.
پاشان لە رێگای داتاشۆ چەند وێنەیەكی چالاكیەكانی سەنتەری گەنجان پیشاندران, هەروەها چەند دیارییەكی شاری رانیە لەلایەن ئامادەبوانەوە پێشكەشی میوانەكان كرا، دوا بە دوای ئەوە لەلایەن مامۆستا (محەمەد حەمە صاڵح) بەڕێوەبەری بەرنامە لە منداڵپارێزی كوردستان‌و شارەزا لە بواری جینۆساید باسێك لەسەر مێژووی كوردو چەوسانەوەكانی لەژێر دەستی حزبی بەعس پێشكەش كراو لەلایەن میوانەكانیشەوە بە پرسیار‌و تێبینی باسەكە دەوڵەمەند كرا.
دوا نیوەڕۆی هەمان رۆژ وەفدی میوان ئامادەی بینینی بەرهەمێكی دیكۆمێنتاری بوون كە لە لایەن بەشی راگەیاندنی سەنتەری گەنجانەوە لەسەر شاری رانیە ئامادە كرابوو, ئەم بەرهەمە لە رێگای داتاشۆوە نیشانی میوانەكان درا, دواتر شاندەكە بەشەكانی سەنتەری چالاكی گەنجانی رانیەیان بەسەر كردەوەو بینەری چەند كارێكی هونەری شێوەكاری و میوزیك بوون كە لە لایەن بەشێك لە گەنجانی رانیەوە بۆ میوانەكان ئامادەكرابوو, پاشان لە كاتژمێر (5)ی ئێوارە وەفدەكە سەردانی پڕۆژەیەكی هونەریان كرد كە لەلایەن مامۆستا (بیتوێن عەلی)ەوە لە كۆنترین خانوی گەرەكی قەڵاتی شاری رانیە ئەنجام درابوو. هەروەها سەردانی ناو بازاری رانیەیان كرد‌و لە نزیكەوە لەگەڵ بەشێك لە خەڵكی شارەكە بیرورایان گۆرییەوە,
رۆژی 21-5-2009 وەفدەكە سەردانی هەر یەك لە قائمقامیەتی قەزای رانیەو كۆلیژی زانستە مرۆڤایەتیەكان‌و سەرۆكایەتی شارەوانی رانیەیان كردو چەند كۆبونەوەو بەسەركردنەوەیەكی گرنگیان ئەنجامدا. دواتر بۆ جاری دووەم چەند چالاكیەكی سەنتەری گەنجانیان بەسەركردەوە كەبریتی بوون لە پێشانگایەكی هاوبەشی شێوەكاریو چەند چالاكیەكی مۆزیك. پاشان لەناو بازاری رانیە بینەری پێشانگایەكی فۆتۆگراف بوون كە چەندین دیمەنی جوانی لە خۆگرتبوو ئەم پێشانگایە لەلایەن فۆتۆگرافەر(رەوشت توانا) ئامادەكرابوو. پشان وەفدەكە سەردانی (سەنتەری رۆشنبیری ئاسۆس)كرد و لەگەڵ بەشێك لە ستافی سەنتەرەكە كۆبونەوە, هەروەها لەسەر رەوتی رۆشنبیری ناوچەكە چەند زانیارییەك پێشكەشی میوانەكان كرا.
دواتر بەمەبەستی ئاشنا بوون بە رەوشی ژنان لە ناوچەكەدا و تێگەیشتن لە كێشەو شێوە ژیانی ژنان لە كۆمەڵگای كوردیدا, لەگەڵ بەشێك لە رێكخراوەكانی ئافرەتان‌و ژنانی ناوچەكە كۆبونەوەیەكی تایبەتیان ئەنجامدا، لەو كۆبونەوەیەدا چەند زانیارییەكی گرنگ لەنیوان هەردوو لا گۆردرایەوە.
بۆ رۆژی دواتر شاندەكە گەشتێكی تایبەتیان بۆ ناساندنی شاری رانیەو بینیی شارۆچكەو گوند و سەیرانگاكانی سنوری قەزای رانیە پێكراو بەشداری چەند ئاهەنگ و شاییەكی میللیان كرد كە لە لایەن خەڵكی ناوچەكە رێكخرابوو.
ئەمەو لە درێژەی سەردان‌و پرۆگرامەكانیان رۆژی 23-5-2009 وەفدەكەی ئەمریكا سەردانی هەر یەك لە پەپمانگای كۆمپیوتەر‌و كتێبخانەی گشتی رانیە‌و بنكەی رۆشنبیری رانیەو نوسینگەی بەدواداچونی توندو تیژی بەرامبەر بە ژنانیان كردو چەند كۆبونەوەیەكی تایبەتیان ئەنجامدا, لەو سەردانەدا چەند زانیارییەكی گرنگ لەسەر شێوەی بەرێوەچوونی كارەكانیان بۆ میوانەكان خرانە روو,
لە دوای نیوەرۆی هەمان رۆژ وەفدەكە سەردانی كەمپی ئاوارەكانی بناری قەندیلیان لە ژاراوە كرد و چەند خێزانێكی ئاوارەی ناو كەمپەكەیان بەسەر كردوە, ئەم كەمپە كە بریتی بوو لە 205 ماڵ‌و بەهۆی تۆپبارانی ئێران‌و توركیا بۆ سەر سنورەكانی هەرێمی كوردستان ئاوارەبوون, لەم سەردانەدا كە بۆ ماوەی 2 كاتژمێر گفتوگۆ لە نێوانیان بەردەوام بوو, باس لە رەوشی ژیانی ئاوارەكانی بناری قەندیل كراو وەفدەكەش پشتیوانی خۆیان بۆ داواكانیان دەربری.
پاشان لە رۆژی 24-5-209 وەفدەكە سەردانی پەیمانگای هونەرە جوانەكانی رانیەیان كرد و لە لایەن بەرێوبەرو بەشێك لە مامۆستاكانی پەیمانگاكەوە بە گەرمی پێشوازی كران, دواتر بەشەكانی پەیمانگایان لە هەردوو بواری ( وێنە كێشان و میوزیك) بەسەر كردەوەو چەند بەرهەمێكیان پێشكەش كرا.
دوا بە دوای سەردانی بەڕێوەبەرایەتی چالاكیە هونەریەكانی رانیەیان كردو گوێبیستی چەند بەرهەمێكی گۆرانی و مۆزیك بوون كە لە لایەن گروپی منداڵانی ئەو بەرێوبەرایەتیەوە پێشكەشیان كرا.

لە دوا رۆژی پرۆگرامی كارو چالاكیەكانیان رۆژی 25-5-2012 شاندەكە سەردانی هەر یەك كازیوەی منداڵانی رانیەیان كرد چەند چالاكیەكی منداڵانیان بەسەر كردەوە, پاشان شاندەكە سەردانی بەرێوبەرایەتی چاودێری كۆمەڵایەتیان كرد لەسەر چۆنیەتی بەرێوەچوونی كارەكانیان و رەوشی چاودێری كۆمەڵایەتی لە كوردستان بیرورا گۆردرایەوە, دواتر لە كاتژمێر 5ی ئێوارەی رۆژی 25/5/2009 لە هۆڵی سەنتەری چالاكی گەنجانی رانیە كۆنگرەیەكی رۆژنامەنوسی بۆ ئەو وەفدەكە رێكخرا كە تێیدا ناوەرۆك‌و مەبەست‌و ئەنجامی سەردانەكە بە كەناڵەكانی راگەیاندن رادەگەیەنرا

جێگای ئاماژەیە ئەو شاندەی شاری دولوزیشەوە پێك هاتبوون لە (تۆم مۆرگن، پڕۆفیسۆری زانكۆ، بڕۆكس ئەندرسن چالاك لە بواری ئاشتی‌و بەرەنگاربوونەوەی شەڕ، ئاڕنۆ خان، پسپۆڕ لە بواری دیزانی بیناسازی، مارف ئەیكین مامۆستای زانستی كۆمەڵایەتی، سالیما سپێنسن، چالاك لە رێكخراوی ئاشتی نێو نەتەوەیی، دۆنا هاوەرد پسپۆڕی بواری دەرونزانی)،

تاگەکان: